ميرڪ عبدالرحمان ٺٽوي : ميرڪ عبدالرحمان بن ميرڪ محمود شيخ الاسلام نالي هيءُ بزرگ پنهنجي ڀاءُ ميرڪ عبدالوهاب وانگر فن، هنر ۽ سخاوت ۾ يگانو شخص ٿي گذريو آهي. سندس پويون زمانو مرزا محمد باقي ولد مرزا عيسيٰ ترخان جي دور ۾ گذريو ۽ محمد باقي هڪ ظالم ۽ ڪنجوس حڪمران هو، جنهن ڪري کيس هميشه خطرو رهندو هو ته سندس حڪومت خلاف ڪو انقلاب نه اچي وڃي. هو شڪي مزاج ۽ وهمي ماڻهو هو، جنهنڪري ميرڪ عبدالرحمان ۽ سندس سوٽ ميرڪ عبدالوهاب جي سخاوت کان ڏاڍو ڊپ رهندو هوس ته متان ڪا مخفي سازش ڪري حڪومت جو تختو نه اونڌو ڪري ڇڏين. 992 هجريءَ ۾ جلال الدين محمد اڪبر جي دربار جو خاص نوڪر شاهه خواجه نالي حج جي سفر تان موٽي اچي ٺٽي ۾ ميرڪ عبدالرحمان جي گھر ۾ مهمان ٿيو. ميرڪ پنهنجي عادت موجب، سندس وڏي مهمان نوازي ڪئي. شاهه خواجه جڏهن ٺٽي مان بادشاهه جي درٻار ۾ پهتو، تڏهن ميرڪ ڏانهن واکاڻ ۽ شڪريي جو خط موڪليائين، ان تي مرزا محمد باقيءَ کي شڪ جاڳيو ته ميرڪ جا بادشاهي درٻار ۾ رسوخ ۽ تعلقات وڌي ويا آهن، متان منهنجي خلاف ڪا سازش ڪري وجهي، ان ڪري ميرڪ عبدالرحمان کي عيد جي ڏينهن 991 هه/1583ع ڌاري پنهنجي سوٽ سيد ميرڪ عبدالوهاب سميت شهيد ڪرائي ڇڏيائين.